قصة سندريلا الليبية

خشو وضحكو مع قصة سندريلا بالليبي

بسم الله الرحمن الرحيم

السلام عليكم ورحمة الله وبركاته

اليوم جبت قصة سندريلا بالطربلسي

اتموت من الضحك

او شوفوها

كادت الشمس تزرق في ليبيا ... و في حوش كبير (( 3 ادوار)) ... ومسميينه قصر .. ..
و في القصر هذا تسكن فيه فاطمة العمشة و بناتها الزوز ... زينوبة ــــ و ـــ فتحية

ومعاهم اختهم من بوهم اللي هيا ربيبة فاطمة الحولة يا حنة و اسمها

سندريلا
المهم ... ناظت سندريلا لما زرقت فيها الشمس ... وخشت للكوجينة و بدت تعصد في العصيدة و توتيها لمرات بوها و خواتها... و بعد ما ضمت الكوجينة
و كنست وسط الحوش و غسلت الحوايج ... ناضو خواتها و امهم لقو العصيدة

فاطمة الحولة : سندريلا .. انتي يا فرخة ... عصيدة باللعسل؟ وين الرب؟
سندريلا : دورت في الكوجينة مالقيتاش .. يمكن تم
فاطمة الحولة : شنو !! تم؟ يا فرحة امك بيك ...اكيد انت لاحساته يا مفجوعة
سندريلا : سكري فمك و مصمصيه بالزهر قبل ماتجيبي سيرة امي ..
فاطمة الحولة: تي والله كان انوضلك الا منريشلك شعرك اللي اللي زي الليفة ..
سندريلا : معلوم منو لشعرها زي الليفة .. شوفي بناتك المقملات و بعدين تكلمي عالشعر يا صلعة
زينوبة : نهار احرش ... تي نوضي كسريلها وجهها يمة
و خشت بعضها دعكة بين فاطمة الحولة و سندريلا ... و ضربت سندريلا الحولة على تاكمها طيحتلها سنها و رفعوها للسبيتار
و هما مروحين من السبيتار
فاطمة الحولة : تي والله الا مانوريها ..

فتحية : هيا نمشو نشكو فيها
زينوبة: ايه يمة نشكو فيها خلي يحبسوها
فاطمة الحولة : ..بعد ما يحبسوها منو بيضم الحوش و بيطيبلنا .. ماهو من فلاحتكم حتى لحسة مكرونة ما تعرفو تديروها

فتحية : لا هو انتي هو اللي كل يوم اتطهبجي
فاطمة الحولة : هيييييي .. غير راك تقوليها قدام حد براني
و اول ما خشو سمعو واحد يعيط و يقول :
الحاظر يقول للغايب ... ولد العقيد خليفة مداير حفلة و جايب زمزمات و زكرة ... يبي يتزوج .. و كل بنات طرابلس معزومات و اللي بتعجبه بيتزوجها ...
(( العقيد خليفة من اثرى اثرياء طرابلس ))
شافت زينوبة لامها و قالت : شنو بنمشو يمة و الا لا ؟

فاطمة الحولة : هييي .. و هذي في كلام .. اكيد بنمشو بلكي نفتك من وجه وحدة منكم .. و اهو نحصلو قصعة كسكسي بالمرة ..
فتحية : روروروروروروروروروروروروري .. بنتزوج بنتزوج
فاطمة الحولة : تي قعمزي و اهفتي يا بنت ... كان ما يصيرش خلي يديروني نساوين الشرقية نكتة ..
و روحو للحوش ...و قعدت سندريلا تكويلهم في حوايجهم و تلبس فيهم

سندريلا : شني يا عمتي فاطمة ... نمشي معاكم؟
فاطمة الحولة : عمية تعميك ... توا طلعتلك عمتك .. ااه؟ ... جاية تثغوطي توة ماهو صار فيها المشي .. ..(( و تمطقت تمطيقة باهية )) و بعدين ريتش هالمنظر
اللي بتمشي .. امشي نقي شكارة الرز كلها ...و بعدين نقي الدشيشة ... تي والله نروح و نلقى فيهم حبة سودة نحارفلك يومك ...
تحسابي بنفوتهالك عملتك اااه؟
و الا تحسابيني بنسكتلك ... غير انروح بس
و طلعو و ركبو في افيكو الشرقية
فاطمة الحولة : وين .. المدينة ؟
السواق : لالا ..مكة ..كخخخخخخخخخخ .. ايه يا حاجة المدينة هيا اركبي
و ركبت هيا و بناويتها
واحد من الركاب شاف لزينوبة و عاكسها
زينوبة : يا سعدودي يا سعدودي ... معجب بيا
فاطمة الحولة : تي اسكتي انتي الثانية .. و بعدين شنو يا سعدودي هذي اه؟ ا تكلمي باهي يا بنت
زينوبة : هذا كلامي يمة
فاطمة الحولة : اسمعي .. ردي بالك تتكلمي و تشتخي قدام ولد العقيد .. اقعدي ساكتة .. و لما يقولك حاجة هزي راسك بس ..لين نجيكم انا و نسلك الامور باهي
زينوبة : باهي كان قالي انا معجب بيك ... شنو بنهز راسي؟
فاطمة الحولة : تقعدي ساكتة بس ... شنو تبيه يسمع صوتك و يهرب
فتحية : قبل ما نوصلو لحوش ولد العقيد بنسالك يمة

فاطمة الحولة : قولي يا همي ... اه غير كان تتسقدي انت بس ...
علاش قلتي لسندريلا تنقي الرز ؟ شنو عشانا رز بلاو؟
فاطمة الحولة : هذا فاش فالحة يا هبة يادبة ... فالحة غير في بطنك ...
...........زز
سندريلا و هيا تنقي في الرز ... قررت انها تمشي للحفلة .... طلعت للشارع و نادت على مصباح
سنريلا : مصباح ... بس ... اسمع
مصباح مش مصدرق روحه ... سندريلا تنادي فيه
مصباح : منو انا ؟
سندريلا : ايه انت .. امالة غولتك
مصباح : ايوة يا سندريلا ... تفضلي
سندريلا : نبي منك خدمة
مصباح : انت تؤمري يا سندريلا .. ادللي بس .. اطلبي عمري .. اطلبي روحي ...عيوني
سندريلا قالت في خاطرها يالله نغصب على روحي شوية و نتحمل بسالته و دمه اللى زي شكارة الشمنت ...و بعدين نوريه عمره و روحه كيف ... والله لو
كان نعنس و انت اخر راجل ما ناخدك يا عايب ...
مصباح : خير القمر سرحانة
سندريلا : فيك يا بدر (( ياوجه الفقر )) ... نبي منك خديمة صغيرونة ..وكان انت تحبني حق تنفدهالي ...
مصباح : اؤمريني بس ...
سندريلا : يعني تنفد اللي نقولك عليه ؟
مصباح : تي غير قولي شنو تبي بس
سندريلا : نبيك تدبرلي في قفطان حليوة متع سهرة ... نبيه ضروري ضروري
مصباح : بس انت عارف خواتي كلهم سمونيات زي البقرات ..مافيش وحدة مقاسها زيك
سندريلا : معناها ماتحبنيش ..
مصباح : تي لا يا سندريلا .. انا نموت فيك ... اصبري ..تو نمشي لوليد صاحبي يخدم في لاوندرية .. اكيد نلقى عنده قفطان حلو يليق عليك يا تحفة انتي
سندريلا : باتهي برا بسرعة ..جري .. و انا نستناك هنا
و مشى مصباح و حصللها قفطان سهرة ابيض (( زي الفيللو )) .. و شكله هكي متع وحدة هابي
سندريلا : يا سلمك جياب و عليك حجاب ....اشيه يهبل ...
مصباح :باش تشوفي بس غلاوتك يا حبي ..
سندريلا : باهي القفطان مش يبي كنيدرة حلوة هكي تطلع عليه؟
مصباح :اتدللي
ومشى جابلها كندرة اخت صاحبه ...
سندريلا : يا سلمه يا سلمه ....
و هيا خاشة بتقيسهم ..ناداها مصباح
مصباح : اسمعي ... الساعة طناش ضروري تجيبي القفطان
سندريلا : علاش؟
مصباح : ماهو صاحب اللاوندرية بيغسله و يسلمه لصاحبته غدوا
سندريلا : باهي باهي
مصباح : راهو كان ماجيتيش بيمشيلك في الحفلة و يحشمك قدام الناس
وخشت لبست القفطان و الكندرة ... و طلعت نادت مصباح تاني
مصباح : بي بي بي ..و لا جسم هيفاء وهبي ..ما شاء الله ما شاء الله
سندريلا : مصباح : نبي سيارة ضروري ضروري
مصباح : اتدللي
وقفلها اول بيضة وكحلة و خلص التاكسي و ركبت سندريلا
وصلت سندريلا للحفلة ...و الكل يتمقلو فيها و في قفطانها و خصوصا كندرتها ... وكانو يتمنو يعرفو من اي محل شاريتها ...
المهم كان في شبيب واقف سمه
بوعجيلة.. شاف سندريلا انضرب فيها .. و قال هيا هاذي اللي ندور فيها
بوعجيلة : هاي
سندريلا : و عليكم السلام و رحمة الله ...
بوعجيلة : ممكن نتعرفو
سندريلا : شنو نتعرفو متعك هدي ... امشي العب بعيد ...
بو عجيلة:غر خلى نهدرزوا شوية
سندريلا : شنو تبي مني .. مبدرك و مبرد دمك
بو عجيلة:نبى رقمك
سندريلا : خيرك هكي عشاش .. اسمع و النبي امشي خير ما يجي ولد العقيد و يلقاك واقف معاي بعدين يفوتني انا
بوعجيلة : انت جاية على خاطر ولد الامر ؟
سندريلا : امالة جاية على خاطرك انت يا غزال ؟
بوعجيلة : خلاص .. معناها اوصلتي يا حلوة
سندريلا : حتى انا عارفة روح وصلت يا حلو ... شنو قاللولك في الشارع ندور ؟
بوعجيلة : قصدي وصلتي لقلب ولد العقيد
سندريلا : شنو قصدك وصلت لقلبه ..احترم نفسك ايوه
بوعجيلة : تو انتي بجديات ماعرفتيش منو انا ؟
سندريلا : لا ما عرفتش ... و منو تطلع انت ؟ السواق و الا الخدام
بوعجيلة : تعرفي انتي حلوة و دمك حلوووووووووووو
سندريلا : تعرف كان ماتقلبش وجهك توا .. بنعيط و نقول سرق مني شنطتي
بوعجيلة : ههههههههه و منو بيصدق انه ولد العقيد بسرق شنطة وحدة زيك ... هو صح انتي حليوة و امورة بس باين انك متشحطة و فقرية
سندريلا : قصدك انت ولد العقيد خليفة ؟
بوعجيلة : و خيره مش طالع عليا و الا شنو ...
سندريلا في خاطرها : واااااااااااااك ما اشناااااااااك ... خسارة فيك حتى زينوبة اختي ... والله مصباح الاجرب قاعد احلى منك ... بس الله ا
هو ناخده على فلوسه
و نفتك من فاطمة الحولة و بناتها ...
بوعجيلة : خيرك سكتي
سندريلا : (( و تضحك في الضحكة الصفرة )) ... مش معقولة ... تعرف باين عليك هكي ولد عيلة وناس ومحترم ..
بس انت متواااااااااضع لدرجة اني حسبتك السواق
بوعجيلة : ايه ايه .. عندك الحق .. هلبة ناس ما يعرفوش اني ولد العقيد خليفة .. ماهو انا زي ماقلتي متواضع هلبة
سندريلا تسبل في عويناتها : و معقولة ا لقيتش بنية هكي حلوة و امورة ...
بوعجيلة : ومنو قالك مالقيتش ؟
سندريلا : امالة علاش مداير حفلة و عازم كل البنات مش باش توازي منهم وحدة
بوعجيلة : ايه و و انا وازيت خلاص
سندريلا : و منو سعيدة الحظ هذا اللي فازت بالفلوس قصدي بولد العقيد
بوعجيلة : وحدة حلوة و لسانها طويل
سندريلا : منو هذا اللي ماتتحشمش و تطول لسانها عليك .. قولي عليها و انا نقصلها لسانها
بوعجيلة : ماصح وجهك .. تبي تقصي لسان اللي بتولي زوجة ولد العقيد ... معقولة يا حلوة تقصي لسانك اللي يقطر عسل
سندريلا : تي شنو تقول يا .. شنو اسمك حقة؟
بوعجيلة : اسمي بوعجيلة يا روح بوعجيلة ...شنو اسمك انتي يا روحي
سندريلا : يا .... تسمحلي ندلعك؟
بوعجيلة : نسمحلك !!! ؟ ... اي اسم تناديني بيه حيكون حلو زيك
سندريلا : تسلملي با بوعة
بوعجيلا : الله الله الله .. بوعة ..محلاها من فمك
وفجأة ولعو الميوزيك ... وعلى انغام البوعبعاب يعزم بوعة سندريلا على رقصة شعبية ... و عيون فاطة الحولة و فتحية و زينوبة
وكل الحاظرات على عيون لسندريلا و قواها الممشوق و كندرتا اللي تبقص من بعيد ....
و فجاة دقت عقارب الساعة ...
سندريلا : حيه عليا ...الساعة طناش جت
بوعجيلة : خيرك يا سندريلا ... شنو فيه
و طلعت سندريلا خط ..طلعت تجري ... وبوعجيلة يجري في جرتها ...هيا تجري ... وهو يجري ... هيا تجري .. وهو يجري ..هيا تجري ...
وهو يجري ..
اخر حاجة لا ما لحقش بوعجيلة عليها ... خدى رشادة كبيرة و ظرب ساندريلا بيها و طاحت السندريلا
سندريلا : تي ليلتك مش هيا ... تضربني برشادة بعد خليتني معاقة ....
و تملخ فردة شلاكتها و تعطيهالها من بعيد و هربت .. يجي كعب الكندرا في ا عين بوعجيلة ..و طاح في مكانه يعيط و عينه انفقصت ...
وسمعت واحد ينادي فيها
مصباح : سندريلا .. يا سندريلا
سندريلا : باهي اللي جيت ...
مصباح : لما عطلتي عليا قلت خلي نجي ناخد القفطان ماهو صاحب الاوندرية منبهني لازم نرده الليلة
سندريلا : غير هيا خلي نمشو بسرعة بعدين ساهل
و ركبت معاه و روحو للشرقية ...
سندريلا : استناني هنا ..تو نمشي نغير و نجيبلك القفطان و الكندرة ... و انت ما جبتهم في عام خير
مصباح : باهي بسرعة هيا
و خشت سندريلا غيرت القفطان .... و لما جت بتحطه في كيسة هو و الكندرا .. مالقتش فردة الكندرة ...
وطلعت تجري
سندريلا : حيه عليا يا مصباح ..
مصباح : ماتقوليش مزقتي القفطان
سندريلا : لالا ...
مصباح : الحمد لله ...
سندريلا : لكن فردة الكندرا نسيتها في الحفلة
مصباح : شنو ؟ نسيتيها ؟ .. حيه عليا ... هدي كندرة اخت صاحبي جايبهالها خطيبها في بيانها ... و صاحبي سرقها منها سرقة ... دبري فيها
و الله ما دخلي فيك
سندريلا : كيف بندبر فيها ها .. قلت لك نسيتها ..
مصباح : مادخليش فيك .. دبري فيها
سندريلا : مش تحبني انت و مستعد تدير اي شي على خاطري
مصباح : ايه نحبك و نموت فيك .... لكن .. شنو بنقول لصاحبي .. وصاحبي شنو بيقول لاخته ها
سندريلا : معقولة فردة شلاكة تبدلها بيا انا حبيبتك ...
مصباح : اه يا حبي ... باهي يا عيوني بري تو خشي ارقدي ...و انا ندبر راصي
سندريلا : ايه ... هكي الحب الصح
مصباح : هيا تصبحي على خير .. و احلمي بيا باهي
سندريلا في خاطرها : ناقص غير تخش في احلامي ...يا والله مصباح و خلاص
ثاني يوم ... لما سندريلا كات تدير في الغدا ... سمعت زينوبة جاية تجري
زينوبة : يمة يمة
فاطمة الحولة: وميك توميك .... شنو تبي ..خيرك جاية تجري ؟
زينوبة : ولد العقيد يا يمة .. ولد العقيد
فاطمة الحولة : خيره ولد العقيد .
زينوبة : جاي هنا يمة
فاطمة : يا رورورووروروروروروروروي ... جاي بيخطبك ؟
زينوبة : تي لا يمة ... جاي هنا يبي بنات الشارع يقيسو فردة الكندرا متع البنت اللي هربت البارح ...و اللي بتجي عليها بتزوجها
فاطة الحولة : طيح سعدك ..حسبته جاي لحوشنا بيخطب وحدة منكم يا مصايب ... اه يا ربي ... غير منو بيخطبهم هذو منو
زينوبة : هيا بنمشي يمة
فاطمة الحولة : وين بتمشي ؟ لقطع رقبتك؟
زينوبة : بنمشي نقيس زي بنات الشارع ... بلكي تجي عليا و بيتزوجني
فاطمة الحولة : تو انتي بتجي عليك كندرة البنت اللي رقصت معاه البارح ... تحشمي على وجهك ..انتي تلبسي 46 راك كان مش عارفة
زينوبة : خزي عليك يمة ... خلي نمشي نجرب بالك تجي عليا
فتحية : حتى انا يمة حتى انا
زينوبة : انت اقعدي هنا ... انا الكبيرة ..انا نتزوج قبلك
فتحية : يسلام يسلام ... باهي افرض ماجتش عليك انت و تجي عليا ....قوليلها يمة قوليلها
فاطمة الحولة : ايه خليها تمشي معاك ..هيا رجلها اصغر ..تلبس 43 بالك تجي عليها
فتحية : اممممممممم(( خشيم لامها ..قصدي بوسة ))مممممممممممه ... يا حنينة انتي ..
و طلعت جرى
فاطمة الحولة : اسمعي تعالي جاي يا بنت ... تعالي جاي
فتحية : شنو يمة
فاطمة الحولة : وين طالعة هكي تجري
فتحية : شنو تبيني ندر
فاطة الحولة : امشي البسي شخيشر ... والله تبيه يشوف الشقاق اللي ف رجليك ... و الا ضفارك اللي رايحات زي ضفار العنزة الشارفة
فتحية : ماهو شخشيري مشرك يمة
فاطمة الحولة : البسي شخشير سندريلا ..اجري
وسمعت سندريلا الكلام كله ...و فرحت ... و طلعت حتى هيا تجري ...و اول ما وصلت لراس الشارع لقت البنات دارات زحة و طوابير ... كلهم يبو يقيسو ....
بوعجيلة (( وداير سير متع كرادلية بيجو على عينه زي القرصان )) : ديرو طوابير يالله ... بلا زحمة .. خير ما نسيبكم و نمشي نشوف الشارع اللي وراكم
و دارو بنات الشرقية طابور طووووووووووووويل ....و لما شافه ولد العقيد طويل هلبة
بوعجيلة : اسمعو انتو هلبة ... احسن شي نقولكم ..الكندرة مقاسها 34 ... يالل اي وحدة مقاسها اكبر من هكي تنسحب خير من الزحمة
و من الطابور الطويل هداك كله ... ما قعدوش غير زوز بناويت سندريلا و وحدة افريقية.... طلعو بنات الشرقية كلهم مقاسات ضخمة ...
الافريقية مدت رجلها تقيس
بوعجيلة : انت شنو تديري
الافريقية : انا في قيس شلاكة
يوعجيلة : عفوا ...يا بناويت
اللي مقاسها اكبر من 34 و اللي مش ليبية ينسحبو احسن
قعدت السندريلا بس ... شافت للامير و قالت له خير يا بوعة
الامير استغرب من كلمة بوعة و الصوت نفسه ... لكن البنت خيرها هكي ..شعرها حايس في بعضها و قفطانها كلهابقع .... زعمة هيا نفسها ؟
بوعجلة : لو سمحتي يا حلوة قيسي الكندرا
سندريلا : حاظر يا بوعا
و اول ماحطت رجلها في الكندرة ..خشت و كانها مفصلة عليها هيا فصالة
بوعجيلة : حصلتي يا سندريلا ... انا بوعجيلة ولد العقيد خليفة تخليني اعور ... اعور؟
اسمع يا فندي انتا و اياه .. شدوها و عالشيلة طول
سندريلا : يا بوعا .. يا بوعتي ...مش قصدي
بوعجلة : لا بوعة و لا بوعبعاب ... ارفعوها هيا
و شدو سندريلا و حطوها في سيارة المحابيس ... و زينوبة و فتحية يضحكو عليها ....و شافها مصباح... مصباح يا ناري على مصباح ....
و بدا يجري مصباح وراها و ينادي
سندريلا .....سندريلا .... انحبك يا سندريلا ...
و رفعو سندريلا للشيلة و حولوها للنيابة .... و وكل لها مصباح محامي .....
مصباح : ماتخافيش يا حبي ... تو نطلعك براءة
سندريلا و هذا شنو للي جابه لحبس ياهمي ..لاحقني حتى هنا : شنو يا مصباح شو تبي
مصباح : نبيك انت يا سندريلا
سندريلا : انا بيحمكو عليا بخمسطاش سنة ... قضية فقص عيون راهي ... و عين منو عين ولد العقيد خليفة
مصباح : غير اسمعي كلامي و انا نطلعك منها زي الشعرة من العجينة
سندريلا : كيف تطلعني
مصباح : نطلعك والله نطلعك ..بشرط تتزوجيني
سندريلا : نتزوجك
مصباح : ايه .. ايه امالة نطلعك و تتزوجي واحد ثاني
و فكرت سندريلا شوي بنها و بن نفسها ... قالت هو احتمال يموت قبل خمسطاش سنة ... يعني نتزوجه خير...مانقعد خمسطاش سنة في الحبس
سندريلا : موافقة لكن كيف
مصباح : هيا الكندرة متع منو ؟
سندريلا : كندرة اخت صاحبك
مصباح : خلاص تمت الحكاية
و طلعت سندريلا براءة و حكمو على اخت صاحب مصباح خمسطاش سنة حبس... لانها خطيبها جابلها كندرة طليانية في بيانها
و تزوجت سندريلا مصباح اللي كان يبي يجيب بنت حلوة تشبه امها و يسميها شعلة ..بس سندريلا قررت انها ما تجيبش منه و لاولد ... عل وعسى يتوكل ....
بعد خمسطاش سنة بالزبطط ... رمت سندريلا عدتها ... و هيا في الشهر السابع من الحمل ... وجابت ولد سماته البوعة ....

مشـــــــــــكووووووووووورة بارك الله فيكي القصة حلوة يســـــلمووووووووووووووو

ننتضر المزيــــــــــــــــــــــــــــــــــــــــد يا امورة

ههههههههههههههههههههههههههههههه
ههههههههاى
خطيره بكل
القصه مت تليفك ههههههههههههههههههههع

لا شكرا علي واجب يابنات

تقبلي مروري

شكرا لمن كتبها

شكرا لمن كتبها